Një ngjarje e rëndë kriminale është parandaluar në zonën e Malit të Robit në Golem, ku 47-vjeçari Melison Nela u kap i armatosur, teksa dyshohet se po shkonte të hakmerrej ndaj personave që kishin dhunuar nipin e tij. Ngjarja nisi pas një konflikti në një hotel të zonës, ku 18-vjeçari Genti Nela, i cili punonte si kamerier, është dhunuar pas një konflikti lidhur me pagesën për punën e kryer. I riu ndodhet në Spitalin e Kavajës, nën kujdesin e mjekëve. Policia, e njoftuar për konfliktin, ndërhyri menjëherë në hotel. Gjatë veprimeve hetimore, shërbimet morën informacion në rrugë operative se xhaxhai i 18-vjeçarit, Melison Nela, 47 vjeç, ishte nisur drejt hotelit i armatosur, me qëllim vrasjen e personave që kishin dhunuar nipin. Policia e ndaloi automjetin e 47-vjeçarit në afërsi të hotelit. Gjatë kontrollit, në një çantë shpine u gjet një kallashnikov, tre karikatorë dhe 84 fishekë luftarakë. Ndërkohë, hetimet zbuluan se pas konfliktit, vendi i ngjarjes ishte pastruar. Gjithashtu, ishte hequr DVR-ja e kamerave të sigurisë dhe ishin prerë kabllot e tyre. Në lidhje me dhunimin e 18-vjeçarit, policia vuri në pranga Florian Habilajn, 28 vjeç, dhe Enold Dragotin, 20 vjeç, ndërsa Arbër Habilaj, 36 vjeç, u shpall në kërkim. Në gjendje të lirë po procedohet 36-vjeçari Melison Nela. Ndërkohë, në pranga u vu edhe 47-vjeçari Melison Nela, xhaxhai i 18-vjeçarit Genti Nela, i cili u kap me kallashnikov, tre karikatorë dhe 84 fishekë në automjet. Hetimet vijojnë në bashkëpunim me Prokurorinë për zbardhjen e plotë të rrethanave dhe dokumentimin ligjor të ngjarjes. Njoftimi i Policisë: Kavajë/Parandalohet një ngjarje e rëndë kriminale. Me armë zjarri në automjet, po shkonte për të vrarë personat që kishin dhunuar nipin e tij, falë informacionit të marrë në rrugë operative dhe ndërhyrjes në kohë nga shërbimet e Policisë, parandalohet një ngjarje e rëndë kriminale. Vihet në pranga 47-vjeçari, i cili u kap me armë zjarri automatik, 3 karikatorë dhe 84 fishekë luftarakë. Arrestohet djali i pronarit të hotelit dhe një shok i tij, shpallet në kërkim djali tjetër i pronarit, ndërsa procedohet në gjendje të lirë dhëndëri i pronarit, të cilët kishin dhunuar 18-vjeçarin, (kamerier në lokalin e hotelit dhe nipi i 47-vjeçarit) Shërbimet e Komisariatit të Policisë Kavajë dhe të Stacionit të Policisë Golem, pas marrjes së njoftimit për një konflikt në një hotel në zonën e Malit të Robit, Golem, kanë shkuar menjëherë në vendngjarje, duke parandaluar përshkallëzimin e mëtejshëm të konfliktit. Nga veprimet e para hetimore rezultoi se shtetasi F. H., së bashku me shtetasit A. F., E. D. dhe M. M., kanë dhunuar shtetasin G. N., 18 vjeç, kamerier në lokalin e hotelit, për shkak të mosdhënies së pagesës për punën e kryer. 18-vjeçari ndodhet në Spitalin e Kavajës, nën kujdesin e mjekëve. Gjatë kryerjes së veprimeve, shërbimet e Policisë kanë marrë informacion në rrugë operative se xhaxhai i 18-vjeçarit, shtetasi M. N., 47 vjeç, banues në Kavajë, i armatosur me armë zjarri, ishte nisur drejt hotelit, me qëllim vrasjen e personave që kishin dhunuar nipin e tij. Shërbimet e Policisë kanë ndërhyrë menjëherë, duke ndaluar në afërsi të hotelit automjetin që drejtohej nga ky shtetas. Gjatë kontrollit të automjetit, në një çantë shpine, shërbimet e Policisë gjetën një armë zjarri automatik, kallashnikov, 3 karikatorë dhe 84 fishekë luftarakë. Po nga veprimet hetimore rezultoi se vendngjarja ishte pastruar, DVR-ja e kamerave të sigurisë ishte hequr dhe kabllot ishin prerë. Në përfundim të veprimeve të para hetimore, u bë arrestimi në flagrancë i shtetasve F. H., 28 vjeç, dhe E. D., 20 vjeç, banues në Kavajë; u shpall në kërkim shtetasi A. F., 36 vjeç; u procedua në gjendje të lirë shtetasi M. M., 36 vjeç, banues në Kavajë. Gjithashtu u bë arrestimi në flagrancë dhe i shtetasit M. N., 47 vjeç, banues në Kavajë. Në bashkëpunim me Prokurorinë, vijon puna për dokumentimin e plotë ligjor të kësaj ngjarjeje. Materialet procedurale i kaluan Prokurorisë për veprime të mëtejshme.