Kryeministri Edi Rama thotë se Shqipëria është në fazën përfundimtare të pastrimit nga korrupsioni, ndërsa mbron reformën në drejtësi dhe shpreh rezerva për disa nga procedurat që ndiqen ndaj të hetuarve. Në një intervistë për median gjermane WELT, Rama u pyet për arrestimin e ish-drejtoreshës së Shërbimit Informativ të Shtetit, Vlora Hyseni, si dhe për hetimet e dënimet e zyrtarëve të tjerë të lartë. Kreu i qeverisë e përshkroi këtë situatë si një ndryshim të mënyrës se si funksionon shteti shqiptar. “Shqipëria ishte një vend ku korrupsioni ishte sistemi. Sot Shqipëria është një vend ku sistemi lufton kundër korrupsionit. Jemi në fazën përfundimtare të pastrimit të vendit”, deklaroi ai. I pyetur për veprimtarinë e SPAK-ut, Rama tha se procesi është pjesërisht i dhimbshëm, por i ashpër dhe i pashmangshëm. Megjithatë, kryeministri ngriti pikëpyetje për përputhjen e disa procedurave me standardet europiane. “Jo të gjitha procedurat përputhen me standardet europiane, sipas mendimit tim”, u shpreh Rama. Ai tha gjithashtu se Shqipëria ka normën më të lartë të personave në paraburgim në kontinent, ndërsa kërkoi që vendi të vlerësohet për procesin që po kalon. Media gjermane e pyeti edhe për kërkesat që ai të mbajë përgjegjësi politike për arrestimet dhe dënimet e personave pranë tij. Në përgjigje, Rama deklaroi se, nga krijimi i shtetit shqiptar në vitin 1912 deri përpara ardhjes së tij në detyrë, asnjë ministër nuk ishte paraqitur përpara një prokurori të pavarur. Ai tha se ndihet krenar që Shqipëria është tashmë në gjendje t’i mbajë njerëzit përgjegjës, pavarësisht pozicionit të tyre. Pikërisht këtë mundësi të drejtësisë për të vepruar, Rama e cilësoi si përgjegjësinë e tij politike.