Nuk ka të ndalur vërshimi i emigrantëve të paligjshëm drejt brigjeve italiane. As rreziku i humbjes së jetës nuk i zbraps klandestinët që vazhdojnë të mësyjnë vendin fqinj. 40 vetë arritën të shpëtonin rojet bregdetare italiane mbrëmjen e djeshme pranë Lampeduzës që kishin mbetur në mes të detit me mjetin e lundrues ku ndodheshin. Ata thanë po kështu se një vogëlushe vetëm dy vjece, e cila u gjet pa shenje jetë, nuk u arrit të ringjallej, pavarësisht përpjekjeve e ndihmës së dhënë aty për aty. Mbërritjet e pareshtura të klandestinëve në Lampeduza i kanë vendosur përpara një sprove të vështirë autoritetet italiane, të cilat janë detyruar ta mbajnë vetë mbi supe këtë peshë, që vende të tjera të Europës nuk e ndajnë me të. Në muajin shtator, Franca doli hapur me deklaratat se Franca nuk do ta pranonte asnjë migrant që shkon atje nga Lampeduza italiane. Deklarata e ministrit të brendshëm francez, Gerald Darmanin erdhi pak pasi ishulli mesdhetar kishte regjistruar një rekord emigrantësh. E gjithë situata shtyu dhe vetë kryetaren e Komisionit Europian, Ursula von der Leyen të udhëtonte vetë drejt ishullit. Ndërkohë, plani i qeverisë italiane për të ndërtuar qendra emigrantësh në Shqipëri, i njoftuar në fillim të muajit nga qeveria e krahut të djathtë e kryeministres Giorgia Meloni shihetsi një përpjekje për të penguar vershimin në rritje të emigrantëve nga Afrika dhe për të lehtësuar presionin mbi qendrat në të gjithë vendin.