Ish-avokati i Donald Trump, Michael Cohen, pranoi të hënën përpara jurisë në gjyqin penal ndaj ish-presidentit se ka vjedhur me dhjetëra mijëra dollarë nga kompania e Trump. Cohen e pranoi këtë ndërsa avokatët mbrojtës u përqendruan tek shkeljet e tij, me qëllimin për të ngritur pikëpyetje rreth besueshmërisë së tij. Kjo mund të mbjellë dyshime tek anëtarët e jurisë sa i përket deponimit të bërë nga dëshmitari kyç i prokurorisë, lidhur me përfshirjen e ish-presidentit në çështjen “Stormy Daniels”. I rikthyer në bankën e dëshmitarëve për të katërtën ditë dhe ndërsa po i drejtoheshin pyetje nga avokati mbrojtës, zoti Cohen pranoi se pati përvetësuar një shumë prej 50 mijë dollarësh. “Pra, ju vodhët nga Organizata Trump?”, e pyeti avokati Blanshe, Michael Cohen. “Po, zotëri”, u përgjigj ai, duke shtuar se nuk ia kishte kthyer paratë organizatës. Megjithatë, ndaj Cohen nuk janë ngritur ndonjëherë akuza për vjedhje nga kompania e Donald Trump. Pamejt: AFP