Daniel Server, një prej njohësve më të mirë të politikane ne Ballkan, pohon se nuk ka zgjidhje të qarta e të lehta për ngërcin e Serbisë dhe Kosovës. Por ndërsa nënvizon se duhen ndërmarrë hapa për zbutjen e situates, lëshimin kryesor e kërkon nga Beogradi. “Bllokadat në veri duhet të hiqen. Duhet bërë diçka për t'i vënë individët në veri para përgjegjësisë për atë përshkallëzim. Por mendoj se Serbia duhet të zbusë retorikën e saj, veçanërisht atë për vendosjen e trupave serbe në Kosovë. Është një propozim indinjues”, thotë Server për VOA-n. Ndërsa angazhimi diplomatik i Perëndimit është intensifikuar, zoti Serëer thotë se Uashingtoni duhet të heqë dorë nga qasja për t’u bërë presion të dyja palëve dhe të bëhet shumë më i ashpër me Beogradin. “Serbia ka zgjedhur njërën anë. Unë nuk besoj se ajo po ulet në dy apo tre karrige. Ajo është ulur në një karrige, që unë e quaj të Lindjes, në anën e Kinës dhe Rusisë, por amerikanët nuk po pranojnë që Beogradi ka zgjedhur këtë anë”, thotë ai. Serwer thotë se nëse Uashingtoni është realist për këto qëndrime, do të kishte mundësi të ushtronte më shumë ndikim. Sa për planin franko-gjerman, për të thotë se duhet parë në varësi të mënyrës se si trajtohet asociacioni i komunave me shumicë serbe. “Sipas mendimit tim, asociacioni i komunave me shumicë serbe do të shihej krejtësisht ndryshe nga autoritetet në Prishtinë, nëse Serbia njeh Kosovën. Në kontekstin e mosnjohjes, asociacioni duket si një përpjekje e Serbisë për të ruajtur alternativën për të marrë territor nga Kosova”, thekson Serwer.