Të shtëna me armë janë raportuar në drejtim të efektivëve të policisë mbrëmjen e kësaj të enjteje në afërsi të Rinasit. Policia e Tiranës mori informacion se një person ishte i armatosur në atë zonë dhe organizoi operacion për kapjen e tij. Në momentin që efektivët i janë afruar, 34-vjeçari i identifikuar si Klajdi Buza ka qëlluar me armë zjarri në drejtim të policisë, teksa ndodhej brenda biznesit e tij. Fatmirësisht nga të shtënat nuk pati efektivë të lënduar ndërsa pas kësaj, u bë e mundur kapja e 34-vjeçarit. Policia e Tiranës ka publikuar edhe pamjet nga operacioni tij, si dhe shenjat e plumbave në vendin e ngjarjes. Klajdi Buza rezulton me precedent të mëparshëm penal. Ai është arrestuar edhe tre vite më parë pasi lëvizte i armatosur në Krujë. Po ashtu, vitin 2015 ai ka denoncuar vjedhjen e automjetit të tij tip '‘BMW X 5’, qw u gjet i braktisur në vendin e quajtur ura e Gjoles në Fushë Krujë. Policia ndërkohë nën drejtimin e Prokurorisë po vijon hetime më të thelluara lidhur me ngjarjen, ndërsa arma u sekuestrua si provë materiale.