Një nga eventet më të rëndësishme të jetës politike dhe mediatike në SHBA u ndërpre mbrëmjen e së shtunës nga të shtëna me armë zjarri, duke shkaktuar panik dhe evakuim emergjent të presidentit Donald Trump dhe bashkëshortes së tij Melania Trump. Ngjarja ndodhi rreth orës 20.15 sipas orës lokale, gjatë darkës vjetore të korrespondentëve të Shtëpisë së Bardhë, e mbajtur në hotelin “Washington Hilton”, ku ishin të pranishëm drejtues të lartë të shtetit, anëtarë të kabinetit dhe figura të njohura të medias. Sipas autoriteteve, një person i armatosur hapi zjarr në ambientet e hotelit, duke detyruar ndërhyrjen e menjëhershme të forcave të sigurisë. Agjentët e shërbimit sekret reaguan brenda sekondave, duke evakuuar presidentin dhe të ftuarit kryesorë, ndërsa gazetarët dhe pjesëmarrësit u përpoqën të mbroheshin duke u ulur nën tavolina. Atmosfera në sallë u kthye në kaos, me britma dhe konfuzion, ndërsa forcat e rendit neutralizuan të dyshuarin. Kryebashkiakja e Uashingtonit, Muriel Bowser, konfirmoi se bëhej fjalë për një sulm nga një person i vetëm dhe se nuk kishte indicie për bashkëpunëtorë të tjerë. I dyshuari, i identifikuar si Cole Tomas Allen, 31 vjeç nga Kalifornia, ndodhet në paraburgim dhe po trajtohet në spital, ndërsa hetimet vijojnë për zbardhjen e plotë të motivit.