Parlamenti grek i ka hapur rrugë hetimit penal për 13 deputetë të partisë në pushtet, Demokracia e Re, në lidhje me skandalin e organizmit shtetëror që menaxhon miliarda euro subvencione bujqësore europiane çdo vit ,OPEKEPE. Me shumicë dërrmuese, deputetët votuan për heqjen e imunitetit të tyre, në mënyrë që çështja të kalojë tek drejtësia dhe të hetohet më tej nga Prokuroria Europiane. Vetë 13 deputetët kërkuan heqjen e imunitetit, duke deklaruar se janë të pafajshëm dhe se duan të pastrojnë emrin e tyre. Ata thanë se veprimet e tyre kishin të bënin me ndërhyrje për çështje të qytetarëve dhe zonave që përfaqësojnë, duke mbrojtur rolin e deputetit si ndërmjetës mes shoqërisë dhe administratës. Po pati edhe kritika të hapura ndaj mënyrës si është trajtuar dosja e tyre si dhe ndaj Prokurorisë Europiane. Skandali lidhet me subvencione bujqësore europiane që dyshohet se u morën në mënyrë të paligjshme, përmes deklarimeve të rreme, manipulimeve në aplikime dhe ndërhyrjeve për të favorizuar përfitues të caktuar. Prokuroria Europiane ka dërguar tashmë disa dosje në Parlamentin grek, ndërsa dëmi i mundshëm ndaj buxhetit të Bashkimit Europian vlerësohet në rreth 2.9 milionë euro. Kanë qenë këto zhvillime pas të cilave kryeministri Kyriakos Mitsotakis kërkoi dorëheqjet e disa anëtarëve të qeverisë dhe të partisë, ndërsa kabineti u riformatua pjesërisht disa ditë më parë, ndërkohë që skandali në fjalë ka shtuar presionin ndaj qeverisë konservatore.