Dy persona të lënduar kanë përfunduar në Spitalin e Pukës pas një konflikti të dhunshëm mes dy familjeve në fshatin Dedaj, mbrëmjen e kësaj të marte. Sipas informacioneve paraprake, anëtarë të familjeve Shkreli dhe Istrefi janë përfshirë në një përplasje fizike, ku janë përdorur edhe mjete të forta, duke shkaktuar dëmtime te disa prej tyre. Pas konfliktit, dy persona janë dërguar në Spitalin e Pukës për të marrë ndihmë mjekësore, ndërsa forca të shumta policie kanë mbërritur në vendngjarje dhe kanë nisur hetimet për zbardhjen e plotë të rrethanave. Burime bëjnë me dije se disa anëtare te familjeve jane shoqëruar në komisariat, ndërsa grupi hetimor po vijon veprimet procedurale dhe marrjen në pyetje të personave të përfshirë. Dyshohet se konflikti mes familjeve Shkreli dhe Istrefi është i mbartur prej vitesh dhe lidhet me mosmarrëveshje për motive pronësie.