Dhjetëra qytetarë të prekur nga përmbytjet kanë dalë në rrugë për të kërkuar përgjegjësi dhe shpalljen e gjendjes së jashtëzakonshme në Durrës. Me thirrjet "Turp, turp", “Durrësi, skenë e krimit” dhe “Shpallni gjendjen e jashtëzakonshme ”, protestuesit kanë nisur marshimin nga rrethrrotullimi pranë burgut drejt Bashkisë së Durrësit. Sipas tyre, situata e rëndë e krijuar nga përmbytjet nuk është pasojë e një fatkeqësie natyrore, por e keqmenaxhimit dhe abuzimeve me fondet publike ndër vite. Të mbledhur në sheshin kryesor të qytetit, protestuesit tentuan të hyjnë në bashki, por nuk u lejuan nga kordoni policor. Pjesëmarrësit në protestë kanë hedhur thirrje kundër Bashkisë dhe Qeverisë, të cilat i konsiderojnë përgjegjëse për dëmet e mëdha në banesa, biznese dhe toka bujqësore. Në protestë kanë marrë pjesë banorë të zonës së ish-Kënetës, por edhe banorë të zonave të tjera të përmbytura në Durrës që vijojnë të përballen me pasojat. Protestës i janë bashkuar edhe deputetë të opozitës. Ndërkaq situata në terren mbetet kritike, me banesa dhe rrugë nën ujë dhe banorë që presin të ndihmohen në fatkeqësinë që i gjeti.