Nga 1 shkurti disa vende europiane do të përballen me një taksë prej 10% nga Shtetet e Bashkuara të Amerikës, pasi kundërshtuan planin e Donald Trump për të kontrolluar Groenlandën. Kreu i Shtëpisë së Bardhë njoftoi të shtunën vendimin për tarifën për Mbretërinë e Bashkuar, Francën, Gjermaninë, Holandën, Finlandën dhe vendet nordike. Vendimi i Presidentit Trump solli reagime të forta dhe të menjëhershme nga Bashkimi Evropian. Ursula von der Leyen, dhe Presidenti i Këshillit, Antonio Costa, paralajmëruan se vendosja e tarifave nga Presidenti Trump do të krijonte një “spirale të rrezikshme”. “BE-ja qëndron në solidaritet të plotë me Danimarkën dhe popullin e Groenlandës. Tarifat do të minonin marrëdhëniet transatlantike dhe do të rrezikonin një spirale të rrezikshme në rënie. Evropa do të mbetet e bashkuar, e koordinuar dhe e përkushtuar për të ruajtur sovranitetin e saj”, tha Von der Leyen, ndërsa është thirrur një takim urgjent në Bruksel të dielën. Presidenti i Francës, Emmanuel Macron, iu përgjigj menjëherë Trump, teksa u shpreh se “asnjë frikësim dhe as kërcënim nuk do të na ndikojë”, duke shtuar se “Franca mbetet e përkushtuar ndaj sovranitetit dhe pavarësisë së kombeve”. Ai i cilësoi të papranueshme tarifat e Trump dhe paralajmëroi se “evropianët do t’iu përgjigjen atyre në mënyrë të bashkuar dhe të koordinuar, nëse ato do të konfirmohen”.