Presidenti amerikan Donald Trump ka propozuar një plan të ri paqeje për t’i dhënë fund luftës mes Izraelit dhe Hamasit, i cili përmban 20 pika thelbësore dhe synon një zgjidhje afatgjatë për konfliktin në Rripin e Gazës. Sipas burimeve nga Shtëpia e Bardhë, dokumenti fillimisht përmbante 21 pika, por një prej tyre u hoq pak orë para takimit të Trump me kryeministrin izraelit Benjamin Netanyahu. “Nëse Hamas nuk e pranon këtë plan, atëherë ne do ta lejojmë Izraelin që të përfundojë atë që ka nisur”, ishte paralajmërimi i fortë i Trump. Në qendër të planit qëndrojnë çmontimi i Hamasit, lirimi i pengjeve, tërheqja graduale e Izraelit nga Gaza, si dhe krijimi i një administrate kalimtare teknokrate palestineze nën mbikëqyrjen e një bordi ndërkombëtar të quajtur “Bordi i Paqes”, i kryesuar nga vetë Donald Trump. Kryeministri izraelit, Benjamin Netanyahu, deklaroi se takimi i me presidentin Donald Trump, është një hap kyç jo vetëm për përfundimin e luftës në Gaza, por edhe për krijimin e kushteve për paqe në të gjithë Lindjen e Mesme. “E mbështes planin tuaj për t’i dhënë fund luftës në Gaza,” tha Netanyahu, duke iu referuar planit prej 20 pikësh të propozuar nga Trump. Sipas tij, ky plan do të sigurojë që Izraeli të mos përballet më me kërcënime nga Hamasi. Reagoi edhe Hamas, duke refuzuar përfshirjen e Toni Blair. "Blair është një figurë e papranueshme për popullin tonë. Ne kemi pranuar formimin e një komiteti që nuk përfaqëson asnjë fraksion palestinez për të menaxhuar punët e Gazës pas luftës dhe nuk do të pranojmë imponimin e tutelës së huaj mbi popullin tonë", tha një zyrtari i lartë i Hamasit për “Reuters”.