Shqipëria po dëshmon ritmin më të lartë të reformave në Ballkanin Perëndimor, duke u rreshtuar në krye të rajonit së bashku me Malin e Zi dhe Maqedoninë e Veriut. Sipas analizës më të fundit të organizatës WeBalkans dhe të dhënave zyrtare të Komisionit Europian, vendi ynë ka arritur të sigurojë mbështetjen më të madhe financiare të disbursuar deri më tani, si rezultat i progresit të dukshëm në terren. Që nga nisja e këtij programi madhor në maj të vitit 2024, Bashkimi Europian ka shpërndarë gjithsej 673.6 milionë euro për partnerët e rajonit. Ndarja e fondeve të përfituara deri më tani pasqyron qartë shpejtësinë e zbatimit të detyrave nga secili shtet: Shqipëria: 212.8 milionë euro, Serbia: 167.5 milionë euro, Maqedonia e Veriut: 142.1 milionë euro, Mali i Zi: 91.2 milionë euro, Kosova: 61.8 milionë euro dhe Bosnjë-Hercegovina qw nuk ka marrë ende asnjë pagesë. Fondet e alokuara nga Brukseli po përdoren aktualisht për modernizimin e rrjetit hekurudhor dhe përmirësimin e linjave të energjisë elektrike, zgjerimin e internetit broadband dhe pajisjen e shkollave me mjete digjitale. Po ashtu pwr digjitalizimin e shërbimeve publike dhe thjeshtimin e procedurave për regjistrimin e bizneseve duke pakësuar burokracitë. Plani i Rritjes për Ballkanin Perëndimor përfaqëson paketën më të madhe financiare të vënë ndonjëherë në dispozicion nga BE për rajonin, me një vlerë totale prej 6 miliardë eurosh, 4 miliardë euro kredi me kushte të favorshme dhe 2 miliardë euro grante. Në totalin e këtij plani, Shqipërisë i janë parashikuar 922.1 milionë euro. Megjithatë, Brukseli rikujton se të gjitha projektet duhet të përfundojnë pa asnjë shtyrje afati deri në fund të vitit 2027. Çdo fond i papërdorur apo i bllokuar nga vonesat do t'u rialokohet shteteve fqinje që ecin më shpejt me axhendën europiane.