Tregjet e aksioneve shënuan kryesisht rritje të martën, ndërsa çmimet e naftës ranë, teksa investitorët vlerësojnë planin amerikan për “asfiksimin ekonomik” të Iranit dhe presin rezultatet financiare të gjigantit të çipave Nvidia. Sekretari amerikan i Thesarit, Scott Bessent, deklaroi një “Ditë D ekonomike” kundër Teheranit dhe kërcënoi me masa edhe vendet që vazhdojnë të bëjnë tregti me Republikën Islamike. “Synimi ynë është të ndërpresim çdo burim ekonomik që mban në këmbë këtë regjim, derisa Teherani të mbetet i izoluar”, tha Bessent. Sipas tij, vendet që nuk u bashkohen sanksioneve amerikane do të përballen me pasojat e izolimit të Iranit. Sanksionet e reja pritet të godasin asetet digjitale, teknologjinë, arin, aviacionin dhe sektorin iranian të transportit detar. Dy kontratat kryesore të naftës ranë me më shumë se 2 për qind të hënën dhe vijuan dobësimin të martën. Tregjet i interpretuan deklaratat amerikane si një sinjal se Uashingtoni po përqendrohet te presioni ekonomik dhe jo te një përshkallëzim i ri ushtarak. Bursat në azi, australi dhe europe shënuan rritje të lehtë. Vëmendja kryesore është përqendruar te rezultatet e Nvidia-s, e konsideruar si barometri i bumit të inteligjencës artificiale. Investitorët kërkojnë prova se investimet e mëdha në këtë teknologji po sjellin fitime që justifikojnë vlerësimet e larta të kompanive. Tregjet presin gjithashtu fjalimin e kreut të Rezervës Federale, Kevin Warsh, në takimin vjetor të Jackson Hole, për sinjale mbi politikën monetare dhe normat e interesit.