Një sherr që kishte nisur prej mbrëmjes së djeshme ka përfunduar sot në një plagosje të rëndë me mjet prerës në qytetin e Korçës. Ngjarja ka ndodhur në lagjen numër 1, ku pas një konflikti verbal, njëri nga personat ka përdorur sëpatën për të goditur personin tjetër. Sipas informacioneve paraprake, dy personat, të cilët ishin konfliktuar me njëri-tjetrin mbrëmjen e kaluar për motive banale, janë konfrontuar sërish sot në rrugë. Debati verbal është ashpërsuar brenda pak sekondash, deri në momentin kur njëri prej tyre ka marrë një sëpatë dhe ka goditur personin tjetër. I dëmtuari është transportuar me urgjencë drejt spitalit të qytetit. Sipas mjekëve, ai ka marrë plagë në zonën e shpatullës, por fatmirësisht ndodhet jashtë rrezikut për jetën dhe po merr ndihmën e nevojshme mjekësore. Menjëherë pas marrjes së njoftimit, forcat e policisë kanë mbërritur në vendngjarje dhe kanë bërë të mundur shoqërimin e autorit të plagosjes.