Një konflikt mes dy të njohurish në Qerret të Durrësit përfundoi me plagosjen e një 41-vjeçari dhe shpalljen në kërkim të autorit të dyshuar. Ngjarja ka ndodhur pasditen e së mërkurës, kur, sipas policisë, dyshohet se shtetasi Egzon Sinani goditi me thikë dy herë Haxhi Shehun, pas një konflikti për motive ende të paqarta. I plagosuri u dërgua menjëherë në spital dhe ndodhet jashtë rrezikut për jetën, nën kujdesin e mjekëve. Ndërkohë, Policia ka nisur ndjekjen për kapjen e Sinanit, duke i shtrirë kontrollet jo vetëm në Qerret e Katund të Ri, po dhe më gjerë. Grupi hetimor po punon për të sqaruar plotësisht rrethanat e ngjarjes. Dëshmia e të plagosurit dhe personave të tjerë pritet të hedhin dritë mbi motivin e konfliktit që përfundoi me plagosje. Brenda një jave kjo është plagosja e dytë me thikë në Durrës. Të mërkurën e kaluar një 15-vjeçar u plagos rëndë me thikë nga bashkëmoshatari i tij, i cili u kap disa orë pas ngjarjes nga policia.