Detaje të reja janë zbuluar nga plagosja e personazhit të njohur të TikTok-ut, Fabin Kuçi, i njohur ndryshe si “Gucci”. Sipas njoftimit zyrtar të policisë, hetimet janë në vijim, ku dyshohet se tre shtetas janë afruar me dy automjete rreth orës 23:45 të datës 15 dhjetor 2025, te lokali në lagjen nr. 9, ku qëndronte 33-vjeçari, dhe kanë qëlluar me armë zjarri drejt tij. Fabion Kuçi rezulton me precedentë penalë jashtë Shqipërisë. Ai ka vuajtur dënim me burg në Angli dhe është rikthyer në Shqipëri disa muaj më parë. Pas kthimit, ai u bë mjaft aktiv në platformën Tik-Tok, ku shpesh përfshihej në debate dhe përplasje virtuale me figura të tjera të njohura të rrjetit, si Kozak Braçi dhe Xhemal Ujka, i njohur si “Fire”. Fabion Kuçi njihet për historinë e errët jashtë Shqipërisë, ku rezulton i dënuar me burg. Ai ishte pjesë e grupit të njohur Hellbanianz, e cila fillimisht ishte e njohur për aktivitetin muzikor, por mediat britanike kanë raportuar për përfshirjen e tyre në grabitje, shpërndarje droge dhe përdorim armësh. Në vitin 2018, Fabion Kuçi, së bashku me dy bashkëpunëtorë të tij, u arrestuan nga autoritetet britanike, pas disa njoftimeve të autoriteteve për organzimin e një vjedhjeje në Angli. Pas gjykimit, Kuçi u dënua me rreth 6.4 vite burgim, duke përfshirë edhe periudhën e paraburgimit. Gjatë vuajtjes së dënimit, ai dhe bashkëpunëtorët e tij u panë duke postuar pamje online nga qelia, duke tërhequr vëmendjen e mediave britanike dhe publikut shqiptar.