Rreth orës 16:00 të së mërkurën katër persona të maskuar e të armatosur kanë plackitur një dyqan për shitjen e arit në Suharekë. Tek largoheshin një njësi e Policisë arriti në vendin e ngjarjes e kësisoj mes të dyshuarve dhe efektivëve pati edhe shkëmbim zjarri ku dy policë mbetën të plagosur, njëri me armë zjarri e tjetri u lëndua gjatë aksionit. Ata pas trajtimit mjekësor janë liruar meqë gjendja e tyre shëndetësore është stabile. Policia e Kosovës ka vendosë edhe një pika të kontrollit në Suharekë me qëllim kapjen e të dyshuarve që arritën të largoheshin nga vendi i ngjarjes.   “Të dyshuarit janë larguar nga vendi dhe policët iu janë vënë pas, gjatë rrugës të dyshuarit kanë vendosur pengesa të ndryshme dhe kanë arrit që të arratisën”, thotë Policia e Kosovës teksa njofton se ende nuk ka identifikuar të dyshuarit dhe kërkon bashkëpunimin e qytetarëve. Ndërkohë që aksioni për kapjen e të dyshuarve është zgjeruar edhe në Komunën e Ferizajt meqë sic mësohet të dyshuarit janë larguar në atë drejtim. Autoritetet e sigurisë në këtë komunë thonë se janë vendosur pika kontrolli në hyrje daljet e qytetit.   Sipas pronarit të dyqanit vlera e vjedhur e arit arrin në 250 mijë euro, derisa Prokuroria thotë se nuk ka bërë ende një vlerësim.