Rregullatorët në Europë pohuan se një inflamacion ne zemër është efekt anësor i vaksinave kundër Covid tq prodhuara nga kompanite Pfizer/ Biontech e Moderna, edhe pse fenomeni sipas tyre mbetet mjaft i rrallë. Agjencia Europiane e Ilaçeve sqaroi se ky efekt anësor është pikasur më shumë tek meshkujt e rinj. Ajo megjithatë i mëshoi sërish idesë se përfitimet e vaksinave kundër koronavirusit vazhdojnë t`i kapërcejnë rreziqet. Por mjekët dhe pacientët janë këshilluar që të jenë të vetëdijshëm për simptomat e inflamacionit në zemër. Në to përfshihen dhimbja në gjoks dhe ndjesia e mosmbushjes me frymë. Pesë persona kanë ndërruar jetë deri tani nga ky komplikacion, por sipas agjensisë kanë qenë më të moshuar ose kanë pasur edhe probleme të tjera shëndetësore. Rregullatorët e medikamenteve në SHBA lëshuan po ashtu disa ditë më parë një paralajmërim në vaksinat e kompanive Pfizer/BioNTech dhe Moderna, për inflamacion të lehtë në zemër, për individët që marrin këto doza. Vaksinat e dy prodhuesve administrohen me dy doza.