Nga veriu ne jug e diela u karakterizua nga temperatura të ulëta e reshje të dendura bore në formën e stuhive në zonat malore. Trashësia e borës ka arritur nga 40 cm në 70 cm në Mirditë, Bulqizë, Kukës, Dibër, Librazhd dhe Korçë. Në Kukës si pasojë e stuhisë së borës do të pezullohet mësimi për këtë të hënë në disa njësi administrative. Zyra Vendore Arsimore Kukës nisur nga sutuata e motit dhe vlerësimit të sigurisë së transportit të nxënësve dhe mësuesve ka vendosur pezullimin e mësimit në Shishtavec, Zapod, Bushtricë, Ujmisht, Malzi, shkolla Kalimash, shkolla Çinamakë dhe Mamëz. Intensiteti i lartë i reshjeve të borës e ka bërë të pamundur lëvizjen nga Prrenjasi në drejtim të Qafë-Thanës e cila qëndroi e bllokuar më shumë se 2 orë. Borëpastruest po punojnë për zhbllokimin e rrugës, ndërsa edhe policia është në terren për të mos lejuaj lëvizjen e mjeteve pa zinxhirë apo goma dimërore. Është ndaluar po ashtu kalimi i mjeteve të rënda dhe autobusëve në këtë aks si pasojë e ngricave të krijuara në rrugë. Edhe pas bllokimit, drejtuesit e automjeteve thonë se lëvizin me shpejtësi tejet të reduktuar. I bllokuar është po ashtu aksi nacional Librazhd-Peshkopi, trashësia e dëborës së Stëblevë i ka kaluar 50 cm. Ndërkohë që reshje borë ka pasur edhe zonat malore të Elbasanit dhe Gramshit. Ndërsa në orët e vona të mbrëmjes bora nisi edhe në aksin Elbasan-Tiranë, ku policia nuk lejon lëvizjen pa goma dimërore. Problematike mbeten akset nacionale Korçë – Pogradec dhe Pogradec – Qafë Thanë. Për shkak të kushteve të vështira atmosferike, Policia Kufitare Greke njoftoi atë të Korcës se nuk do të lejojë lëvizja e mjeteve të tonazhit të rëndë deri në një njoftim të dytë mbi situatën e motit.