Presidenti i Brazilit, Luiz Inácio Lula da Silva, do t’i nënshtrohet një operacioni tjetër për të minimizuar rrezikun e gjakderdhjes në tru. Lula, 79 vjeç, pritet t’i nënshtrohet procedurës plotësuese këtë të enjte, sipas ekipit të tij mjekësor. Procedura synon të reduktojë gjakderdhjen dhe të parandalojë akumulimin e gjakut midis trurit dhe kafkës. “Ekziston një mundësi e vogël që në të ardhmen, arteriet e vogla të meninges mund të shkaktojnë ende gjakderdhje të vogël”, u tha gazetarëve mjeku personal i Lulës, Dr. Roberto Kalil Filho. “Pra, kjo procedurë plotësuese e procedurës kirurgjikale është për të minimizuar rrezikun që kjo të ndodhë në të ardhmen.” Kalili tha se procedura relativisht e thjeshtë dhe me rrezik të ulët, pa kirurgji do të kryhej mëngjesin e së enjtes dhe do të zgjaste rreth një orë. Kalil përsëriti se operacioni i parë i presidentit ishte kryer pa komplikime dhe tha se presidenti po shërohej me hapa të shpejtë. “Ai është mirë, është ulur, duke folur dhe duke ngrënë”, tha ai. Ekipi mjekësor i Lulës tha se presidenti ishte vigjilent e i angazhuar dhe e kishte kaluar ditën duke iu nënshtruar fizioterapisë dhe duke marrë vizita nga anëtarët e familjes.