Më të pakët në numër, por me kërkesa të qarta të artikuluara në bulevard u përmbyll edhe nata e 29-të e protestës në Tiranë. Mes kërkesave të artikuluara ishte ajo e dorëheqjes së kryeministrit dhe Qeverisë, krijimi i një qeverie teknike tranzitore dhe jo partiake për 12 muaj. “Kërkesa 1 e panegociueshme është dorëheqja e Ali Babës me 40 hajdutë. Ky njeri, me librin ‘Albanian Files’, tregon arrogancën e tij se si i trajton shqiptarët, si çifligun e tij ky antishqiptar” Protestuesit kërkuan gjithashtu ndryshime kushtetuese me referendum që përfshin ndryshimin e kodit zgjedhor, ligjit për financimin e partive politike dhe organizatave të ndryshme por edhe kufizimin e ushtrimit të detyrës së kryeministrit jo më shumë se 2 mandate. “Natyrisht, kjo nuk është një protestë e lehtë. Ka mijëra fije interesash që e lidhin me oligarkinë, por kjo na bën edhe më të fortë. Ju jeni dëshmitarë të një ndryshimi epokal, që nuk do të largojë vetëm Ramën, por të gjithë klasën politike. Vuçiç, si vëllai i Ramës, paralajmëroi dorëheqjen. Iku dhe një diktator. Tani do të marrë me vete edhe Ramën”