Xhamia e Namazgjasë do të përurohet ditën e enjte, ndërsa Komuniteti Mysliman Shqiptar ka dhënë detaje për inaugurimin e saj, ku pritet të jenë prezentë kryeministri Edi Rama dhe Presidenti turk Rexhep Tajip Erdogan. Sipas njoftimit, thuhet se në ceremoni do të jetë i pranishëm gjithashtu edhe Myftiu i Tiranës, Gazment Teqja, i cili do të jetë kreu i bordit të fondacionit të përbashkët, që do të administrojë Xhaminë e Namazgjasë më tej. “Kjo xhami është një ëndërr e kahershme e popullit shqiptar, e cila u bë e mundur falë bujarisë së popullit vëlla turk dhe insistimit të Presidentit të Republikës së Turqisë, Recep Tayyip Erdoğan. Po ashtu Xhamia e madhe e Namazgjasë nuk do ishte bërë sot realitet pa mbështetjen e madhe administrative po edhe financiare të Qeverisë Shqiptare, që falë vullnetit të Kryeministrit Edi Rama i hapi rrugë konsolidimit të pronësisë sonë mbi truallin e Namazgjasë” Në prag të përgatitjeve për vizitën e Presidentit të Turqisë në Shqipëri imami turk, Enes Bashtyr, ka njoftuar në rrjetet sociale se i është besuar drejtimi i Xhamisë së Namazgjasë në Tiranë. Pak pasi e ka bërë publik emërimin e tij në xhaminë e kryeqytetit, imami turk e ka fshirë statusin e tij në rrjetet sociale.