Xhamia e Namazgjasë do të përurohet ditën e enjte, ndërsa Komuniteti Mysliman Shqiptar ka dhënë detaje për inaugurimin e saj, ku pritet të jenë prezentë kryeministri Edi Rama dhe Presidenti turk Rexhep Tajip Erdogan. Sipas njoftimit, thuhet se në ceremoni do të jetë i pranishëm gjithashtu edhe Myftiu i Tiranës, Gazment Teqja, i cili do të jetë kreu i bordit të fondacionit të përbashkët, që do të administrojë Xhaminë e Namazgjasë më tej. Xhamia e Namazgjasë në Tiranë tanimë ka një drejtues dhe ai nuk është një hoxhë shqiptar, por një imam turk. Ministria e Çështjeve Fetare në Turqi ka caktuar Imamin e Xhamisë së Namazgjasë. Ka qenë vetë Imami turk Enes Bastur i cili ka bërë me dije këtë lajm. Përmes një reagimi në rrjetet sociale ai ka njoftuar se i është besuar drejtimi Xhamisë Qendrore Namazgja në Tiranë. “Të dashur miq me udhëzimet e Drejtorisë tonë të çështjeve Fetare më caktuan te faltorja e madhe e Xhamisë qendrore Namazgja në Tiranë”, shkruan ai. Pavarësisht se ai thotë se është emëruar imam i Xhamisë së Namazgjasë, deri më tani nuk ka një reagim zyrtar. Madje Imami Enes Bashtur e ka fshire nga rrjetet e tij sociale këtë njoftim. Të pyetur nga Top Channel, zyra e shtypit e Komunitetit Mysliman të Shqipërisë tha se nuk kanë asnjë qëndrim zyrtar për këtë lajm, dhe se emërimet në krye të xhamive nuk i bëjnë institucionet fetare të shteteve të huaja, por institucionet fetare shqiptarë. Edhe imamë të tjerë nuk pranuan të prononcohen duke u përgjigjur shkurt që nuk ka asgjë zyrtare. Ky lajm i paraprin vizitës ditën e enjte në vendin tonë të presidentit turk Rexhep Taip Erdogan. Burime zyrtare bëjnë të ditur se Erdogan do të mbajë një konferencë me kryeministrin Rama dhe gjithashtu do të inaugurojë edhe xhaminë e Namazgjasë.