Kryeministri Edi Rama udhëtoi këtë të martë drejt Francës për të marrë pjesë në Samitin për Ukrainën, që organizohet nga Presidenti francez, Emmanuel Macron. Kreu i qeverisë shqiptare u prit në Pallatin Elysee nga Presidenti Macron, pak para nisjes së Samitit, ku nuk mungoi një shtrëngim duarsh dhe një përqafim mes liderëve të dy vendeve. Më herët, gjatë vizitës zyrtare në Paris, kryeministri Edi Rama u takua dhe me ministrin francez të Drejtësisë, Gerald Darmani, me të cilin bisedoi për konsolidimin e draftit të Kodit të ri Penal, në mënyrë që të jetë në përputhje dhe harmoni të plotë me standardet evropiane. "Përpara samitit të Koalicionit të Vullnetmirëve për Ukrainën, thirrur nga Presidenti Emmanuel Macron në Pallatin Elysée, u takuam me ministrin e Drejtësisë së Francës, Gérald Darmanin, për të folur lidhur me pjesëmarrjen e partnerëve francezë, në grupin e reflektimit mbi problematikat e politikës penale në Shqipëri dhe konsolidimin e draftit të ri të Kodit Penal, në harmoni të plotë me standardet e me praktikat më të mira europiane".