Dita e katërt e protestës kundër investimit në Zvërnec mori përmasa më të gjera dhe theu qetësinë e ditëve të kaluara. Bashkë me protestuesit, në shesh për herë të parë ishte edhe policia, e cila ndodhej në terren për shkak të ndeshjes miqësore Shqipëri-Izrael. Kjo sjellje u konsiderua provokim nga qytetarët, të cilët çanë kordonin dhe shkuan te kryeministria, ku u përballën me uniformat blu. Ndërhyrja e policisë ishte e menjëhershme. Autobotët me ujë u hodhën ndaj protestuesve, duke shpërndarë turmën e njerëzve. Por protestuesit nuk u tërhoqën dhe vijuan para Kryeministrisë, me mesazhet “Shqipëria nuk është në shitje” “protesta është e popullit, nuk ka vend për partitë”. Pas më shumë se tre orësh qëndrimi para godinës qeveritare, qytetarët mbyllën protestën me njoftimin se do ta vijojnë edhe të enjten.