Deklaratat e presidentit serb, Aleksandër Vuçiç, për mundësinë e ndryshimit të rrjedhës së Lumit Ibër, ka krijuar përplasje diplomatike mes Tiranës Zyrtare dhe Beogradit, në një kohë kur mes dy vendeve po zhvilloheshin negociata pozitive për hapjen e konsullatës serbe në Shkodër. Shefi i diplomacisë shqiptare, Ferit Hoxha, dënoi paralajmërimin e presidentit Vuçiç, teksa i kujton të drejtat ndërkombëtare të ujërave ndërkufitare. “Shqipëria pret që Serbia të respektojë plotësisht detyrimet e saj ndërkombëtare dhe parimet e fqinjësisë së mirë. Çdo projekt ose masë që mund të ndikojë në rrjedhën, sasinë apo cilësinë e ujërave që prekin Kosovën duhet të trajtohet me transparencë, mbi bazën e të dhënave shkencore, me vlerësim të plotë të ndikimit ndërkufitar dhe përmes konsultimit me palën e prekur. Uji nuk mund të përdoret si instrument presioni politik dhe as si mjet për të ndëshkuar një vend apo një popullsi tjetër”. I menjëhershëm dhe i ashpër ishte reagimi i Beogradit. Ministri i Jashtëm i Serbisë, Marko Djuriç, sulmon qëndrimin e Tiranës Zyrtare, me pretendimin se vendi ynë nuk ka të drejtë të ndërhyjë në mënyrën sesi Serbia menaxhon burimet e saj ujore.