Një aksident i rëndë trafiku u shënua orët e para të ditës së sotme në autostradën Salzburg–Mynih, në të cilin sic pohuan mediat gjermane, është përfshirë një autobus udhëtarësh nga Kosova. Autobusi është përplasur me një kamion me rimorkio që po udhëtonte përpara tij. Kompania Dubova Reisen konfirmoi përfshirjen e mjetit të saj në përplasje. Media gjermane, Rosenheim24 dhe Bild duke cituar policinë gjermane, thanë se 30 persona u lënduan gjatë aksidentit. Sipas Bild, gjashtë nga pasagjerët u lënduan rëndë dhe u dërguan në spital, ndërsa të tjerët, me lëndime më të lehta u trajtuan në departamentin e zjarrfikësve në Irsshenberg. Kompania vetë i dha të tjera shifra Radio Europa e Lirë. “Fatmirësisht, pasagjerët janë mirë, vetëm tre nga ta janë me lëndime të lehta për shkak të dëmtimit të xhamave. Aksidenti ndodhi rreth orës 00:30. Autobusi ishte në korsinë e tij, një kamion ka ardhur nga e majta, nga ana e shoferit, duke ia humbur drejtimin”, thanë drejtues të saj. Në autobus ndodheshin gati 50 pasagjerë. Kamioni, i cili transportonte perime, humbi një pjesë të ngarkesës për shkak të përplasjes. Për pasojë, autostrada në drejtim të Mynihut u bllokua për disa orë për pastrimin dhe heqjen e mjetëve, duke u rihapur rreth orës 03:00 të mëngjesit. Autobusi i dëmtuar rëndë u desh të tërhiqej nga vendi i ngjarjes. Sipas të dhënave paraprake të policisë, shoferi i autobusit e kishte vënë re me vonesë kamionin me rimorkio dhe, ndonëse u përpoq të devijonte, u përplas me pjesën e pasme të rimorkios. Nga goditja, pjesa e përparme e autobusit “mbeti e ngjitur” pas rimorkios dhe u dëmtua rëndë.