Një aksident tragjik detar ka ndodhur mbrëmjen e së hënës në Gjirin e Ksamilit, ku një mjet lundrues tip “Jet Car” është përplasur me skafin e Policisë Kufitare të Sarandës. Si pasojë e përplasjes ka humbur jetën 22-vjeçari Albiano Kreçi, banor i Ksamilit.Ngjarja ka ndodhur rreth orës 18:30, ndërsa sipas informacionit paraprak të Policisë së Shtetit, i riu po lundronte me mjetin e tij në det dhe dyshohet se, për shkak të shpejtësisë, është përplasur me skafin e Policisë Kufitare. Mjeti policor ndodhej i stacionuar rreth 400 metra larg vijës bregdetare, në monitorim të hapësirës detare. Perplasja ka qenë e fortë, duke bërë që mjeti lundrues të fundoset menjëherë pas aksidentit. Menjëherë pas ngjarjes, punonjësit e Policisë Kufitare, së bashku me drejtues të tjerë mjetesh lundruese që ndodheshin në zonë, kanë ndërhyrë për nxjerrjen e të riut nga deti. Ai është transportuar me urgjencë drejt Spitalit të Sarandës, por nuk ka mundur t’u mbijetojë plagëve të marra.Burimenga vendngjarja bëjnë me dije se pas aksidentit janë transportuar drejt spitalit edhe persona të tjerë për të marrë ndihmën e nevojshme mjekësore. Ndërkohë, në zonë janë angazhuar forca të shumta policie dhe shërbimet e emergjencës për menaxhimin e situatës dhe kryerjen e veprimeve të para hetimore.Menjehere pas ngjarjes është ngritur një grup i posaçëm hetimor dhe, në bashkëpunim me Agjencinë e Mbikëqyrjes Policore, nën drejtimin e Prokurorisë, po kryhen veprimet për zbardhjen e plotë të rrethanave të aksidentit. Autoritetet po hetojnë për të përcaktuar me saktësi shkaqet e ngjarjes, ndërsa deri tani dyshohet se përplasja ka ndodhur si pasojë e lundrimit me shpejtësi të mjetit tip “Jet Car”. Ngjarja ka tronditur banorët e Ksamilit dhe pushuesit që ndodheshin në zonë, ndërsa hetimet vijojnë për të hedhur dritë mbi një nga aksidentet më të rënda detare të regjistruara këtë sezon turistik në jug të vendit.