Një 31-vjeçar që kishte thyer masën e sigurisë “Arrest në shtëpi” i ka shpëtuar ndjekjes policore ditën e sotme në Durrës. Sipas policisë, ngjarja u regjistrua në lagjen nr. 14, pranë tregut të makinave, ku shërbimet e forcës së posaçme “Shqiponja”, gjatë patrullimit në zonë, i kanë bërë shenjë ndalimi një automjeti Benz që po lëvizte me shpejtësi. Drejtuesi nuk i është bindur urdhrit të efektivëve dhe ka vijuar lëvizjen për t’u larguar. Ndjekja ka vijuar në rrugët e qytetit. Automjeti ka përplasur pesë mjete të parkuara dhe në lëvizje pranë tregut të fruta-perimeve. Përplasjet kanë shkaktuar vetëm dëme materiale. Pas kësaj, drejtuesi, i identifikuar nga Policia si Regi Xhanari, 31 vjeç, ka braktisur automjetin dhe është larguar me vrap nga vendi i ngjarjes. Shërbimet e Policisë kanë nisur kontrollet në terren për kapjen e tij. Nga verifikimet rezulton se 31-vjeçari kishte thyer masën e sigurisë “Arrest në shtëpi”, të vendosur nga gjykata për veprën penale të “Mashtrimit”. Pas largimit nga vendi i qëndrimit të detyruar, ndaj tij ka nisur procedim edhe për veprën penale “Largimi i të burgosurit nga vendi i qëndrimit”. Grupi hetimor po vijon veprimet për dokumentimin e plotë të ngjarjes, ndërsa Policia vijon kërkimet për kapjen e 31-vjeçarit dhe vënien e tij përpara përgjegjësisë ligjore.