Pesë turistë shqiptarë kanë mbetur të lënduar pas përplasjes së dy varkave turistike në Liqenin e Komanit, teksa ishin nisur për të vizituar lumin e Shalës. Ngjarja ka ndodhur rreth orës 15:15, kur dy mjetet lundruese janë përplasur me njëra-tjetrën. Paraprakisht dyshohet se shpejtësia e madhe dhe pakujdesia kanë ndikuar në aksident, ndërsa sipas policise ngjarja ndodhi aksidentalisht. Si pasojë e përplasjes, 5 turistët kanë pësuar dëmtime të lehta, kryesisht shtypje në pjesë të ndryshme të trupit dhe gërvishtje. Ata janë nxjerrë fillimisht në breg me ndihmën e banorëve dhe mjeteve të tjera lundruese, ndërsa më pas janë transportuar drejt kalatës së Komanit. Në zonë kanë mbërritur dy helikopterë, të cilët kanë marrë të dëmtuarit dhe i kanë transportuar në Spitalin e Shkodrës, ku po i nënshtrohen kontrolleve më të imtësishme. Sipas Policisë, turistët e tjerë që ndodheshin në dy mjetet lundruese nuk kanë pësuar dëmtime.Të pesë të dëmtuarit ndodhen jashtë rrezikut për jetën.