Situata me zjarret po shkon drejt përmirësimit. Nga 31 vatra zjarri aktive në të gjithë Shqipërinë, në 24 orët e fundit aktive kanë mbetur vetën 3, ndërsa 6 po mbahen nën monitorim. Po vijon beteja me flakët në Dajt ku në operacion janë angazhuar 20 efektivë të Forcave të Armatosura Gjatë ditës së djeshme ndërhyrja u krye nga 60 forca të përbashkëta zjarrfikës dhe FA dhe 1 helikopter për shkak të terrenit të thyer. Aktiv mbetet edhe zjarri në Ballenjë të Dibrës që po zhvillohet në një terren shumë të thepisur dhe shkëmbor. Në vatër aktive zjarri është edhe në Qafën e Helmës në Bulqizë. Në Pukë, zjarret në fshatrat Gojan dhe Gjegjan janë shuar plotësisht pas një operacioni masiv ku u angazhuan 83 forca operacionale, 40 efektivë të FA-së dhe 1 helikopter. Drejt përmirësimit është situata edhe në zonën e Tërbunit në Pukë. Në qarqet e tjera të vendit, të gjitha vatrat e raportuara janë izoluar ose shuar plotësisht nga strukturat lokale të mbrojtjes civile. Për të menaxhuar situatën në total janë angazhuar 370 forca operacionale, 22 automjete dhe 3 helikopterë të Forcave të Armatosura (FA). Agjencia Kombëtare e Mbrojtjes Civile konfirmon se nuk ka rrezik për zonat e banuara nga asnjë prej vatrave aktive.