Diga 2000 vjeçare e ndërtuar nga romakët ka parandaluar tragjedinë e madhe nga përmbytjet në Spanjë. Bëhet fjalë për digën që ndodhet në Almonacid de la Kuba, e cila arriti të kontrollonte rrjedhën e ujit, duke shmangur dëmtimet. Numri i përgjithshëm i vdekjeve nga përmbytjet shkatërruese që goditën jugun dhe lindjen e Spanjës të martën dhe të mërkurën ka shkuar në 217, ku shumica e tyre janë raportuar në rajonin e Valencias. Dhjetëra janë shpallur të zhdukur, ndërsa rreth 3000 familje janë ende pa energji elektrike. Tragjedia është tashmë katastrofa më e keqe e Evropës e lidhur me përmbytjet në një vend të vetëm që nga viti 1967, kur të paktën rreth 500 njerëz vdiqën në Portugali. Shkencëtarët thonë se ngjarjet ekstreme të motit po bëhen më të shpeshta në Evropë dhe gjetkë, për shkak të ndryshimeve klimatike. Sikur të mos mjaftonin përmbytjet katastrofike, policia spanjolle njoftoi arrestimin e rreth 100 grabitësve që kishin në shënjestër shtëpi dhe biznese të braktisura.