“Llogaritja politike për përmbytjet më vdekjeprurëse të Spanjës në dekada duhet të presë derisa vendi të rimëkëmbet nga fatkeqësia, e cila shkaktoi zemërim të gjerë në klasën qeverisëse”, kështu deklaroi kryeministri spanjoll Pedro Sanchez. Qeveria e tij njoftoi gjithashtu një paketë të re ndihme me vlerë pothuajse 3.8 miliardë euro, ndërsa Spanja numëron koston e katastrofës së 29 tetorit që ka vrarë 222 njerëz. Stuhia e jashtëzakonshme mesdhetare që goditi kombin evropian shkatërroi veçanërisht rajonin lindor të Valencias, i cili ka pësuar shumicën e vdekjeve dhe shkatërrimeve. Zemërimi ndaj autoriteteve për keqmenaxhimin e tyre të perceptuar para dhe pas përmbytjeve shkaktuan protesta masive të shtunën, më e madhja në qytetin e Valencias që tërhoqi 130,000 njerëz. Demonstruesit kanë kërkuar dorëheqjen e Sanchez dhe liderit konservator të rajonit të Valencias, Carlos Mazon, por kryeministri i krahut të majtë këmbënguli që të gjitha përpjekjet duhet të fokusohen në rindërtim. Kritikët kanë vënë në pikëpyetje efikasitetin e sistemit të alarmit të rajonit të Valencias, i cili në disa raste arrinte në telefonat e banorëve vetëm pasi uji filloi të rrjedhë nëpër qytete. Vullnetarët kanë furnizuar me ushqim, ujë, ilaçe dhe pajisje pastrimi në disa qytete të shkatërruara pasi autoriteteve iu deshën ditë të tëra për t'i arritur ato.