Italia ka miratuar paketën për ndihmë emergjente në vlerë prej 2 miliardë euro, për të ndihmuar zonat e prekura nga përmbytjet katastrofike në rajonin verior Emilia-Romana. Ky vendim i rëndësishëm u bë i ditur nga kryeministrja Giorgia Meloni, e cila shprehu shqetësimin për situtën e rëndë që shkaktoi 14 viktima. "Ne e dimë qartë se po flasim për emergjenca, se do të ketë një fazë rindërtimi në të cilën nuk jemi ende në gjendje të përcaktojmë nevojën e përgjithshme, dëmin. Në situatën aktuale që është Italia, të gjesh 2 miliardë euro në pak ditë nuk është një gjë e lehtë. Do të ketë një fazë rindërtimi në të cilën ne nuk jemi ende në gjendje të përcaktojmë sasinë e nevojës së përgjithshme, dëmit”. 10,000 persona janë rikthyer tashmë në shtëpitë e tyre, por janë ende 26,000 të tjerë të zhvendosur. Në zonat e prekura është shkatërruar çdo gjë, ndërsa rrugët janë kthyer në lumenj. Përmbytjet vijnë pas disa viteve të thatësirës së madhe në rajon, e cila ka ngjeshur tokën, duke ulur aftësinë e saj për të thithur reshjet. Më shumë se 20 lumenj në rajon dolën nga shtrati, duke shkaktuar një valë prej 280 rrëshqitjesh dheu. Meloni, sapo u kthye në Itali pas takimeve në samitin e G7 që u mbajt në Hiroshima të Japonisë vizitoi qytetet e shkatërruara në zonat Forlì dhe Ravenna.