Ishulli i njohur spanjoll i pushimeve, Ibiza, është përballur me përmbytje të mëdha pas reshjeve të dendura të shiut që ranë të martën. Rrugët e ishullit u mbushën me ujë dhe baltë, duke i shndërruar ato në lumenj të vërtetë, ndërsa automjetet u zhytën pothuajse tërësisht nën ujë. Autoritetet lokale shpallën një alarm të kuq për reshje ekstreme, që përfshiu si Ibizën ashtu edhe ishullin fqinj, Formentera. Sipas paralajmërimeve, në këto zona pritet të bien deri në 180 mm shi brenda vetëm 12 orëve. Pamjet e publikuara tregojnë qytetarë që ecin nëpër ujë të thellë në rrugët kryesore të Ibizës, ndërsa automjetet duken të bllokuara nën ujë. Përveç Ibizës dhe Formenterës, alarmet e motit janë aktive edhe në Majorkë dhe Valencia, për shkak të mundësisë së përmbytjeve të mëtejshme. Frika është se mos përsëritet situate e një viti më parë, kur përmbytje të ngjashme në rajonin e Valencias shkaktuan mbi 230 viktima.