Një gomone e mbingarkuar me 157 emigrantë në bord u përmbys në Kanalin Anglez pasi motori i saj mori flakë gjatë tentativës për të kaluar nga Franca drejt Britanisë së Madhe. Falë një operacioni të gjerë kërkim-shpëtimi ku u angazhuan mjete detare franceze dhe britanike, të gjithë personat në bord u nxorën nga uji dhe u shpëtuan, duke parandaluar një tragjedi të mundshme. Gomonia, e cila raportohet si një nga mjetet me ngarkesën më të madhe të regjistruar këtë vit, mori flakë në zonën franceze të kërkim-shpëtimit dhe më pas u përmbys. Autoritetet franceze sqaruan se klandestinët fillimisht kishin refuzuar ndihmën, ndërsa rojet bregdetare nuk ndërhynë me forcë për të shmangur përmbysjen e parakohshme të gomones. Në mjet ndodheshin fillimisht 162 persona, por 5 prej tyre u shpëtuan gjatë natës në një incident paraprak, ndërsa 157 të tjerët zgjodhën të vijonin lundrimin përpara se t'u digjej motori. Të gjithë emigrantët e shpëtuar u transportuan dhe në portin francez të Bulonjës. Fluksi i gomoneve në këtë kanal mbetet tejet i rrezikshëm, vetëm gjatë javës së kaluar, katër persona humbën jetën në tentativa të ngjashme me mjete të mbingarkuara.