Një i ri rreth 24 vjeç humbi jetën tragjikisht në një aksident rrugor në aksin Lushnje-Berat. Viktima Petro Piti ishte duke drejtuar një autobot të mbushur me naftë kur u përplas me një mjet bujqësor që drejtohej nga Albert Toska, 41 vjeç, pranë fshatit Kashtë-Bardhë. Pas përplasjes traktori përfundoi i copëtuar në kanal ndërsa autoboti u kthye mënjanë në krahun e shoferit duke e zënë drejtuesin poshtë në tokat bujqësore. Banorët e zonës kanë dëgjuar zhurmën e fortë dhe shkuan të parët për ti dhënë ndihmë të aksidentuarit. Sipas dëshmitarëve në vend ngjarje drejtuesi i mjetit bujqësor ishte gati në frenim, por nuk kishte të ndezur asnjë sinjalistikë ndriçuese prapa mjetit. 41 vjeçari Albert Toska ishte duke pritur gruan për ta edhe atë në traktor, por kur ka parë autobotin që po vinte me shpejtësi, ai është hedhur nga mjeti i tij. Viktima ka frenuar aq fort, sa është krijuar një e çarë të madhe në asfalt . Nga frenimi autoboti ka dale nga rruga kryesore dhe u përmbys në tokat bujqësore duke marrë me vete dhe shkulur nga toka edhe 100 metër karrexhatë metalike anësore. Dyshohet se viktima ka parë me vonesë traktorin nga errësira dhe pavarësisht frenimit ai nuk e shmangu përplasjen. Për gati një orë dhjetëra banorë të zonës, policia e Lushnjes, zjarrfikes dhe një mjet bujqësor janë perpjekur të nxjerrin viktimën nga mjeti i cili e kishte zënë poshte me shpresën se ishte gjallë. I riu është dërguar në spitalin e Lushnjes, por nuk mundi të mbijetonte. Policia shoqëroi drejtuesin e mjetit bujqesor për ta marrë në pyetje rreth aksidentit. Aksi rrugor Lushnje - Berat është kthyer në një pikë të rrezikshme aksidentesh për shkak të mungesës së ndriçimit dhe daljes së mjeteve bujqësore në rrugë.