Ndërsa në të gjithë vendin u goditën 23 grupe dhe u arrestuan 233 shpërndarës droge që vepronin kryesisht nëpër shkolla, “Top Channel” ka siguruar dosjen e përgjimeve që çoi në pranga 7 persona në Elbasan, mes tyre edhe një polic. Referuar dosjes, ka qenë një agjent i infiltruar mes shpërndarësve ai që i ka fitur në kurth. Në dosje thuhet se agjenti me emrin e koduar “Koli” ka kontaktuar me të arrestuarin Stiven Faqolli dhe janë takuar në Qukës të Librazhdit. Fillimisht ‘Koli’ ka marrë Stiven Faqollin në lokalin e tij me makinë dhe më pas janë nisur në drejtim të Librazhdit ku janë takuar me dy persona të tjerë që do të shisnin drogën. Në vendin e quajtur “Ura e Bushtricës” në Librazhd, agjenti bashkë Stiven Faqollin kanë takuar dy persona në makinë, njëri prej tyre Glidi Ballolli që është në burg dhe Mikel Poçi. Agjenti ka blerë një sasi kanabisi tek Badolli dhe më pas është larguar. Në dosje është shkëputur edhe biseda e agjentit me shpërndarësit. Ky i fundit iu bën pyetje për cilësinë e mallit, ndërsa shpërndarësit e vlerësojnë “super” drogën që tregtojnë, madje thonë se e kanë pëlqyer të gjithë. Mes të arrestuarave në Elbasan është edhe një personazhi i njohur i internetit ‘Ujku i Cërrikut’, ose Saimir Rexhepi. Ky i fundit ka rënë në kurthin e ngritur nga agjenti i infiltruar ‘Koli’, të cilit i ka shitur kokainë.