Në Moskë është mbajtur funerali i ish-liderit të fundit të Bashkimit Sovjetik Mikhail Gorbaçov. Në fillim për liderin u bënë homazhe në Sallën e Sindikatave, e përdorur prej kohësh për funeralet e zyrtarëve të lartë në Rusi. Vajtuesit ishin të të gjitha moshave, disa mjaft të moshuar për të kujtuar vitet e stanjacionit sovjetik përpara se Gorbaçovi të vinte në pushtet, të tjerë mjaft të rinj sa të kishin jetuar vetëm nën Rusinë e Putinit. Ata qëndruan në radhë të gjata me lule në duar për të treguar respektin e tyre. Por, drejt banesës së fundit Gorbaçov është dërguar pa fanfarat e një funerali shtetëror dhe me mungesën e dukshme të presidentit Vladimir Putin. Sipas qeverisë, agjenda e ngjeshur e Putinit e ka bërë të pamundur pjesëmarrjen e tij. Kryeministri hungarez Viktor Orban, nga ana tjetër, vendosi të udhëtojë sot drejt Moskës për të marrë pjesë në varrimin e ish-liderit sovjetik, e nuk pritet të ketë ndonjë takim m Putinin. “Ai thjesht do t`i japë lamtumirën e fundit Gorbacovit, nuk pati dëshirë për takime”, pohoi zëdhënësi i presidencës ruse, Dmitry Peskov. Edhe pse i shumëvlerësuar në perëndim, Gorbacovi vazhdon të fajësohet prej një pjese të rusëve për reformat e tij, që sipas tyre shkaktuan kaos ekonomik dhe çuan në shembjen e Bashkimit Sovjektik.