Pentagoni ka publikuar për herë të parë mbi 160 dosje sekrete që dokumentojnë shfaqje të objekteve fluturuese të paidentifikuara, disa prej tyre që nga vitet 1940. Dokumentet përfshijnë raportime për disqe fluturuese dhe objekte misterioze të ndritshme, ndërsa publikimi i tyre ka rikthyer debatet mbi mundësinë e jetës jashtëtokësore. Presidenti amerikan Donald Trump dhe sekretari i Mbrojtjes Pete Hegseth e cilësuan publikimin si një hap drejt transparencës për opinionin publik. Pentagoni publikoi të premten një grup të parë dosjesh sekrete që dokumentojnë raportime për shfaqje të objekteve fluturuese të paidentifikuara disa prej tyre që datojnë që nga vitet 1940 — duke rindezur spekulimet mbi ekzistencën e jetës jashtëtokësore. Raportime për disqe fluturuese, si edhe një objekt të ndritshëm portokalli të përshkruar si “Syri i Sauronit” nga “Lord of the Rings”, janë ndër incidentet e përfshira në dosje, të cilat vijnë nga FBI, Departamenti Amerikan i Shtetit dhe NASA, përveç Pentagonit. “Këto dosje, të fshehura prej kohësh pas klasifikimeve sekrete, kanë ushqyer spekulime të justifikuara dhe ka ardhur koha që populli amerikan t’i shohë vetë”, deklaroi sekretari amerikan i Mbrojtjes, Pete Hegseth. Presidenti amerikan Donald Trump përshëndeti publikimin e dosjeve, duke shkruar: “Ndërsa administratat e mëparshme kanë dështuar të jenë transparente për këtë çështje, me këto dokumente dhe video të reja, njerëzit mund të vendosin vetë: ‘Çfarë dreqin po ndodh?’” Më shumë se 160 dosje u publikuan në faqen e Departamentit të Mbrojtjes, i cili zyrtarisht i referohet UFO-ve.