Në prag të festave të fundvitit, qeveria Rama pritet ta hapë pak më shpejt thesin për pensionistët. Për pak ditë, ata do të marrin bonusin e pensionistit, ndërsa premtimin e bëri kryeministri Rama nga asambleja e Partisë Socialiste në Vlorë, ku foli edhe për një ekonomi më të stabilizuar. “250 milion euro në buxhetin e vitit të ardhshëm shkon për pensionistët...për të cilët përveç rritjes së pensioneve përmes riindeksimit të vazhdueshëm të tyre është përcaktuar edhe bonusi i pensionistit që do ta japim përsëri tani në prag të festave por ndryshe nga vitet e tjera pikërisht për shkak se kemi një situatë financiare më të mirë se çdo vit tjetër do të fillojmë ta japim menjëherë, brenda disa ditësh do fillojë shpërndarja e bonusit të pensionistëve për festat e vitit të ri siç u bë dhe vitin e kaluar e gjatë gjithë viteve, por jo në fund të vitit por më përpara”. Përpara vlonjatëve kryeministri tha se për aeroportin po punohet me ritme të larta dhe nëse vijohet kështu, ndërtimi i tij përfundon brenda vitit të ri që presim.