Liderët e BE-së janë ngopur me obstruksionimin e vazhdueshëm të kryeministrit hungarez Viktor Orbán ndaj Ukrainës dhe jo vetëm, e për këtë arsye, shkruan Politico, planifikojnë ta ndëshkojnë atë duke i dhënë Budapest një portofol pa shumë peshë në Komisionin e ardhshëm Europian. Hungaria dëshiron ta frenojë cështjen e zgjerimit, e cila ka ndikim të rëndësishëm edhe për shkak të bisedimeve të BE-së për pranimin e Ukrainës në bllok, por qeveritë kombëtare nuk kanë oreks që komisioneri aktual hungarez Olivér Várhelyi, të vazhdojë të luajë një rol madhor, pohuan tre diplomatë europianë për median e njohur. Orbáni vazhdon të mbetet një aleat i ngushtë i presidentit rus Vladimir Putin në BE dhe liderët e Europës po acarohen gjithnjë e më shumë me zvarritjen e sanksioneve dhe kundërshtimin e tij sa i takon dërgimit të fondeve në Kiev. “Vështirë që Hungaria të lëjohet të mbajë më ndonjë post të fuqishëm pohoi një nga diplomatët, i cili ashtu sit ë tjerët ka preferuar të ruajë anonimitetin. Komisioni Europian është shprehur se qeveritë dhe presidenti i ardhshëm i zgjedhur i tij do të përcaktojnë komisionerët dhe ai nuk do t`i “frenojë vendimet e tyre". Orbán ka bërë muajt e fundit disa përpjekje për të bllokuar ndihmën për Ukrainën dhe ka kërcënuar bisedimet e saj të pranimit. Në korrik, hungarezët do të marrin gjithashtu presidencën 6 mujore të radhës së Këshillit të BE-së, cka u jep atyre kompetenca për të vendosur axhendën.