Parlamenti Evropian i kërkon Maqedonisë së Veriut të zgjidhë çështjen e gjuhës shqipe, që ngriti disa herë në protesta qindra studentë shqiptarë. Në seancën e të mërkurës, Parlamentit Europian miratoi amendamentin për përdorimin e gjuhës shqipe në provimet shtetërore të jurisprudencës në Maqedoninë e Veriut. Sipas draftit që mori shumicën e votave të eurodeputetëve, i bëhet thirrje autoriteteve të RMV-së që të zgjidhin sa më shpejt këtë çështje, si dhe kërkohet që protestat e studentëve shqiptarë të mos portretizohen si faktor destabilizues apo si të motivuara politikisht. “I bën thirrje autoriteteve të Maqedonisë së Veriut që të zgjidhin sa më shpejt çështjen e përdorimit të gjuhës shqipe në provimet shtetërore, për të siguruar zbatimin praktik të Marrëveshjes Kornizë të Ohrit si në ligj ashtu edhe në frymë, dhe të mos i paraqesin në mënyrë të pasaktë protestat e studentëve si të motivuara politikisht apo si një faktor destabilizues”.