Parlamenti Evropian miratoi me 483 vota pro, 103 kundër dhe 70 abstenim, raportin për Shqipërinë për vitin 2025. Në raportin, që mori dritën jeshile nga eurodeputetët, vlerësohet progresi i shpejtë i Shqipërisë gjatë viteve të fundit në procesin integrues drejt Bashkimit Evropian. Në debatin për Shqipërinë, eurodeputetët dhe komisionerja për Zgjerim, Marta Kos, iu bënë thirrje autoriteteve shqiptare të sigurojnë që legjislacioni i miratuar të zbatohet plotësisht, në mënyrë që të arrihet objektivi për mbylljen e negociatave deri në vitin 2027. “Shqipëria është një nga vendet kryesuese në procesin e anëtarësimit në Bashkimin Europian. Objektivi i Shqipërisë për të mbyllur negociatat e anëtarësimit deri në fund të vitit 2027 është një perspektivë realiste”. Një ndër amendamentet më të rëndësishme në raportin për Shqipërinë ishte ai për ndërtimin në zonat e mbrojtura, referuar faktit se Tirana është përfshirë nga protestat, që morën shkas nga investimi i parashikuar në Zvërnec e Sazan. Lidhur me çështjen, Parlamenti Evropian miratoi amendamentin 17, që iu shtua pikës 46 të rezolutës, ku i kërkohet Shqipërisë të vendosë moratorium për procedurat e reja të lejeve dhe ndërhyrjet zhvillimore në zonat e mbrojtura. Amendamenti i kërkuar nga një grup deputetësh të të Gjelbërve në Parlamentin Evropian, i miratuar me votën e shumicës në PE, bën thirrje që çdo projekt në fushën e turizmit në zonat e mbrojtura në Shqipëri duhet t'i nënshtrohet vlerësimeve gjithëpërfshirëse të ndikimit në mjedis në përputhje të plotë me standardet e BE-së, duke përfshirë një proces transparent.