Vetëm pak javë para zgjedhjeve parlamentare të 11 Majit, Partia Demokratike ka firmosur një kontratë lobimi, në vlerën e 6 milionë dollarëve, me një kompani në Uashington. Kontrata është firmosur më 4 prill të këtij viti nga Sekretari i Përgjithshëm i Partisë Demokratike, Flamur Noka dhe garantor shqiptaro amerikanin Nuredin Seçi, me një kompani që zotërohet nga njerëz të afërt të Presidentit Donald Trump, si vajza e Susie Wiles, shefja e fushatws sw Trumpit dhe parashikon lobimin pranë qeverisë amerikane për një periudhë dy vjeçare. Përgjatë kësaj periudhe, siç sqarohet në kontratë, duhet t’i paguhet kompanisë amerikane 250 mijë dollarë në muaj, ku pagesa për tre muajt e parë, prej 750 mijë dollarësh, është bërë në momentin e nënshkrimit. “Klienti (nëpërmjet Garantuesit të tij) do t’i paguajë firmës një mbajtës mujor prej 250,000 dollarësh për një paketë mbështetëse gjithëpërfshirëse të iniciativave të lobimit, advokimit dhe çështjeve gjyqësore strategjike për një periudhë prej 24 muajsh (“garancia mujore”) dhe në përputhje me Afatin e Marrëveshjes. Pagesa për tre muajt e parë (paradhënie) do të bëhet me nënshkrimin e kësaj marrëveshjeje”, thuhet në kontratën e nënshkruar në datën 4 prill. Pagesa është bërë nga fondacioni shqiptaro-amerikan, i përfaqësuar nga Nuredin Seçi, që jeton në Nju Jork. Kontrata është firmosur mes Flamur Nokës dhe ish-këshilltarit të presidentit amerikan, Donald Trump, Carlo Trujillo, në cilësinë e Presidentit të kompanisë ‘Continental Strategy’. “Detyrimi i Klientit për t'i siguruar Firmës informacionin e nevojshëm për të avancuar sa më mirë objektivat e Klientit. Klienti (nëpërmjet Garantëve të tij) është përgjegjës për pagesën në kohë të tarifës mujore dhe shpenzimeve, sipas përcaktimeve më poshtë", thuhet mes të tjerash në kontratë. Kompania e lobimit do të ofrojë disa shërbime për Partinë Demokratike, mes të cilave edhe vendosjen e marrëdhënieve me eksponentë të qeverisë dhe Kongresit Amerikan, mbështetje për reformat në përputhje me marrëdhëniet SHBA-Shqipëri, si dhe realizimin e objektivave të Partisë Demokratike dhe koalicionit “Aleanca për Shqipërinë Madhështore”.