Ndryshe nga Tirana që nuk prodhoi asnjë emër, Kryesia e Partisë Demokratike në Vlorë doli me propozime konkrete për lokalet e pjesshme të 9 nëntorit. Në mbledhjen e të shtunës, Kryesia e PD-së në Vlorë propozoi pesë emra si kandidatë potencialë për garën e 9 nëntorit. Nën drejtimin e deputetit Bujar Leskaj, Kryesia e PD-së në Vlorë propozoi Atird Hoxhën, Eralba Kreshpën, Alta Hazizi Halucin, Genti Hamzarajn dhe Rezembrik Serjanin si kandidatë për zgjedhjet lokale. Të gjithë emrat e propozuar nga dega e Partisë Demokratike në qytetin bregdetar janë aktualisht anëtarë të kësaj force politike. Deputeti Leskaj theksoi se PD Vlorë është tërësisht e angazhuar për këto zgjedhje dhe se konsultimet do të vijojnë edhe të dielën, jo vetëm me të gjitha forumet e degës, por edhe me mbledhjet nëpër rajone të ndryshme të qytetit e qarkut. Pas mbledhjes së të shtunës, PD e Vlorës bëri me dije se kandidatin për zgjedhjet e Bashkisë Vlorë, do ta zgjedhin forumet e kësaj partie dhe emri do t’i delegohet kryesisë së PD.