Partia Demokratike e Himarës ka dalë kundër kandidaturës së Petro Gjikurisë për zgjedhjet e 4 gushtit për kryetar bashkie. Vangjel Dule ka planifikuar të “rrëmbejë” votat e himariotëve me sipërmarrësin shqiptaro amerikan Petro Gjikuria në zgjedhjet që do zhvillohen në 4 gusht për shkak se Partia Demokratike vendosi t’ia lërë edhe këtë herë aleatit të saj PBDNJ, kandidatin për Himarën. Por përmes një postimi në rrjetet sociale, kryetarja e PD-së në këtë qytet, Afrovita Dhimojani shkruan se dega që ajo drejton në këtë bashki nuk është njoftuar dhe as nuk është konsultuar për një vendimmarrje të tillë. “U zyrtarizua kandidatura e Koalicionit Bashkë Fitojmë, z.Petro Gjikuria për zgjedhjet e pjesshme të 4 Gushtit. Si drejtuese e PD Himarë, u informova si te gjithë qytetarët nga mediat. Ndjej detyrimin dhe angazhimin për të sjell në vëmendje se ne si degë nuk jemi informuar e as konsultuar për sa i përket kandidaturës, por jemi vendosur para faktit publik. Nuk është e drejtë’, shkruan ajo ndër të tjera. Arrestimi i Fredi Belerit i hapi rrugë zgjedhjeve në Himarë, e cila pritet të jetë sërish vatër e nxehtë politike, teksa nga mazhoranca kandidon Vangjel Tavo.