Bashkimi Evropian dhe Franca do të investojnë një shumë prej 118 milionë eurosh për përmirësimin e infrastrukturës së ujërave të ndotura në Durrës. Projekti pritet t’i japë qytetit bregdetar një sistem të ri të trajtimit të ujërave të ndotura, në përputhje me standardet e Bashkimit Evropian. Projekti financohet përmes një granti prej 85 milionë eurosh nga BE-ja, të ofruar përmes Kornizës së Investimeve në Ballkanin Perëndimor, si dhe një kredie sovrane prej 33.4 milionë eurosh nga Agjencia Franceze e Zhvillimit (AFD). Projekti do të zbatohet nga Ministria e Infrastrukturës dhe Energjisë në bashkëpunim me Agjencinë Kombëtare të Ujësjellës-Kanalizimeve (AKUK). “Aktualisht, vetëm rreth 20% e ujërave të ndotura të qytetit të Durrësit trajtohet në përputhje me standardet e BE-së, duke kontribuar në një ndotje të konsiderueshme të bregdetit Adriatik dhe kosto më të mëdha mjedisore, ekonomike dhe shëndetësore. Projekti do t'i adresojë këto sfida duke rritur mbledhjen dhe trajtimin e ujërave të ndotura me 85%, si dhe duke krijuar rrjete të ndara të ujërave të shiut dhe ujërave të ndotura në qendrën historike të qytetit”. Delegacioni i BE në Shqipëri Punimet e projektit pritet të fillojnë në vitin 2027, ku parashikohet që 100 mijë banorë të rinj të lidhen me rrjetet e kanalizimeve, pasi kapaciteti i impiantit të trajtimit të ujërave të ndotura do të përmirësohet në ekuivalentin e një popullsie prej 350 mijë banorësh. Gjithashtu, projekti do të kontribuojë për përafrimin e Shqipërisë me standardet mjedisore evropiane sipas Kapitullit 27 të negociatave të anëtarësimit në BE.