Duke nisur nga muaji shtator, qeveria vë në fokus një çështje që prek drejtpërdrejt xhepat e qytetarëve: çmimet e produkteve bazë. Ministrja e Ekonomisë, Delina Ibrahimaj, njoftoi lançimin e platformës “Pasqyra e Çmimeve”, përmes së cilës, qytetarët do të mund të krahasojnë çmimet dhe të shohin se ku të njëjtin produkt mund ta blejnë më lirë. Synimi i kësaj platforme nuk është vetëm krahasimi i çmimeve në dyqane dhe supermarkete. Sipas ministres Ibrahimaj, qeveria do të ndërtojë një mekanizëm raportimi për të ndjekur rrugën e çmimit nga importi apo prodhimi deri në raft, me qëllim identifikimin e hallkës ku ndodh rritja dhe evidentimin e abuzimeve të mundshme. Për të ilustruar diferencat, ministrja solli shembullin e domates, e cila sipas saj, shitet 120 lekë në Tiranë dhe 50 lekë në Lushnjë. Ministrja sqaroi se qeveria nuk do të përcaktojë çmimet në treg, por do të përdorë monitorimin dhe transparencën si instrumente për të ushtruar presion ndaj abuzimeve.